BB也有自己的秩序

毛毛豆 – 19M3D

小豆最近好易發脾氣，
毛毛媽起初以為因為佢出緊幾隻牙仔好唔舒服，
又打完歲半針等等生理上嘅狀況令佢好憫憎。

後嚟搵咗本書睇，
先知道小朋友嘅腦袋發展中，
由於未識協調左腦（邏輯）同右腦（情感），
而呢個年紀右腦較發達，
左腦因為未有足夠生活經驗令佢建立邏輯，
所以暫時都會由右腦主宰，
好容易會情緒大爆發。

小朋友成長係超級的快，
除咗以上提及嘅左右腦發展，
亦同時出現下帖講嘅「秩序敏感期」。
小豆呢排離開房或廳、瞓覺前都要熄電視，
離開某個地方前都要同每樣嘢講byebye，
出街要瞓覺的話一定要毛毛爸抱，
啲門一定要閂好等等。

我相信仲有好多小豆世界嘅規則有待被發現，
現時每次遇到情緒崩潰時，
毛毛媽盡量安撫小豆再用其他事物分散佢注意力。
因為多數嘅崩潰都喺街上/人哋屋企出現，
有人覺得佢好惡，
當然有人覺得係媽媽教得唔好，
毛毛媽有幾晚都反思過、同毛毛爸傾過，
會唔會係我太縱小豆呢？
毛毛爸提返我呢粒仔出世幾日人仔時，
其實都已經係咁惡。

幸好生於資訊泛濫嘅年代，
令初為人母嘅毛毛媽搵到一點科學根據上嘅安慰，
以及圍爐取暖嘅媽媽加油IG POST，
唯有試試各種專家建議嘅方法，
慢慢引導小豆協調好左右腦。

雖然書還未睇完整本，
但睇咗頭兩節都幫助到我了解好多，
甚至會發現大人（內在小孩）都會有類似嘅情緒問題，
書中亦會提供處理方法，
完成整本書後再分享更多，先記低書名 ——
《教孩子跟情緒做朋友：不是孩子不乖，而是他的左右腦處於分裂狀態！(0~12歲的全腦情緒教養法)》

#共勉之