農曆新年忙咗一大輪，終於肯寫第二篇
毛毛媽要勤力啲先得喇～
呢篇想分享入院生仔時，毛毛媽準備咗啲咩同生產過程 ——
生產醫院：仁安醫院
走佬袋執咗啲乜？
- 炒米茶包
- 暖水壺
- 安睡褲一包
- 孕婦衛生巾（最後沒有用過）
- 防漏床墊
- 拖鞋（醫院有提供）
- 毛巾一大一細（抹身、洗面用）
- 長袖睡衣兩套
- 薄身外套一件（防冷氣吹親）
- 帽
- 襪兩三對
- 哺乳胸圍（方便學習餵人奶）
- 母乳防漏墊
- 牙膏牙刷洗面膏護膚品
- 梳髮夾橡根
- 叉電線、耳筒（瞓唔著/煲劇用）
- 包裝紙巾
- 盤一個（可以買摺疊式，或者叫屋企人買一個嚟。浸腳抹身用）
醫院提供咗啲乜？
- 梳、牙刷、拖鞋、浴帽
- 孕婦衛生巾一包
- 床墊一包
- 網褲一包
- 每日熱薑水一壺（慳慳地用都夠抹身一次）
- 熱水凍水及杯
- 紙巾一盒
- 出院 – BB沖涼護膚試用產品一大袋
- 出院 – BB面罩一個
- 出院 – BB成長書、針卡、留念相簿
仁安有基本生仔packeage，毛毛媽join咗一個4日3夜4人房。
Book房時可以問問姑娘，可唔可以安排到同BB房同一層，方便媽媽探BB。
入院當日根據醫院房間佔用情況，upgrade咗去2人房。
而2020年出世的寶寶，正處於肺炎肆虐嘅年代。
幸好5月尾時疫情稍為緩和，毛毛爸先可以陪產。
毛毛豆係第一胎，預產期5月30日，順產。
毛毛媽本身好怕痛，所以感覺到有頻率地宮縮，
約半個鐘一次，就於5月26日晚（七八點左右）去咗一轉醫院，給果俾姑娘彈返出嚟。
5月27日中午食啲嘢之後，又再入醫院。
其實因為唔知幾痛為之生得，至決定入醫院等，
以免手忙腳亂。
最後夜晚8點開始真係開始堅痛，9點入咗準備生間房聞笑氣。
痛到大概凌晨3點終於入產房，半個鐘左右毛毛豆就出世喇🥰
關於笑氣，聞咗其實唔覺會減輕痛楚。
但個人會唔清醒，最痛嗰段時間之後嘅記憶係非常模糊。
如果情況可以，毛毛媽覺得產前去產堂學習下呼吸，
應該幫助到希望順產的媽媽們。
點解唔做無痛分娩？
因為聽聞啲藥直接打入脊椎，唔多唔少影響到神經，
所以幾痛都頂硬上呀⋯⋯！
而家諗返轉頭，都唔係好記得有幾痛🤣
最痛應該係毛毛爸，對手俾我捉到就快斷，
同埋仲要擔當同姑娘溝通嘅橋梁。
（毛毛媽痛到咩都講唔到🙈）
毛毛豆出世後，住院3日就出院。
每日膳食毛毛媽就選擇咗訂醫院嘅餐，一日早午晚再加下午茶，
貴少少仲會有補身燉品，唔錯㗎～
唔想屋企人每日都拎嘢食嚟咁辛苦，係一個好好嘅選擇，
老公嚟探仲可以食埋一份😋
住院期間，每日都有3、4個時段可以去學習餵人奶。
啱啱生完嘅媽媽未必即刻上到奶，但可以去抱下BB，
同埋學習下啲技巧，毛毛媽每節都有去齊。
最後簡單總結一下，如果負擔得起，
去仁安生係一個唔錯嘅選擇，
服務好好，食物ok，唯獨是若果同人share房，
就要睇下遇唔遇到一個好roommate。
毛毛媽隔離床嗰個就嘈到人無覺好瞓😢，
希望各位媽媽唔會遇到呢個情況。
祝願各位媽媽生產順利，BB健康精靈💛
如果有任何問題，歡迎留言/PM毛毛媽啊～
毛毛媽育豆手記 