今日係毛毛媽生完仔後第一個「終極放風日」，
毛毛爸帶住粒豆同我去剪頭髮、配眼鏡同買胸圍。
無錯，生完之後，全職媽媽要做到呢啲事絕不容易，
尤其係囝囝係極痴媽咪（毛毛爸有時會用痴漢嚟形容粒豆痴我嘅程度😆）。
夜晚我亦終於的起心肝為呢個page寫第一個post。
由陀住粒豆到而家湊到8個月多啲，好多嘢想記錄。
留念同時都希望呢啲分享可以幫到人。
第一件我想分享嘅事係 ———
要相信自己直覺做最適合嘅決定，最緊要開心！
毛毛媽從向親朋戚友報喜，到生咗粒豆出嚟湊，
都會不斷聽到千千萬萬種意見。
大肚婆同啱啱生完嘅女人受賀爾蒙影響，
情緒都會怪怪地。
好簡單：
啱聽就聽，唔啱聽就一句「知道，多謝關心」完結。
只有媽媽自己知道陀住有咩唔舒服，食啲咩開心；
只有媽媽自己知道咩方法湊個B最適合當刻情況。
當然，身為人母，都要不斷學習，
搵最適合自己家庭嘅湊B方法同持家模式。
好似陀緊仔基本上戒凍飲係必然，
但係我真係嘔到8、9個月都仲嘔緊，
唯獨是偶然飲杯凍檸茶令我成個人都舒服晒～😌
咁當然飲嘅時候旁人都會「好心」勸阻啦，
唯有就少冰少甜，一人讓一步。
講真，香港貌似好國際都會、走得好前咁，
但其實啲思想同方法都仲係好落後，
陀住B有咩食得唔食得都仲限得好死。
不妨參考下台灣有關懷孕媽媽可以吃甚麼嘅網站，
就會發現冇乜嘢係唔食得，最緊要就係準媽媽開心！
（頭盔：擔心嘅話都係問下醫生/中醫師啦）
至於生咗之後點樣做要個開心媽媽，
打後嘅post再陸續分享（有太多事想講喇😆）。
準媽媽們、媽媽們記住，最緊要開心🥳
今日毛毛媽都好開心，終於可以執靚下自己，
同毛毛爸食lunch時粒豆又乖乖瞓咗，
可以好好享受一下個burger🍔💕。
毛毛媽育豆手記 